A localidade de Allariz acolleu as I Xornadas de Literatura Fantástica Actual en Linguas Ibéricas (Portalen), un evento que reuniu autores e editores para debater sobre o xénero. O broche final destas xornadas, celebradas na sede da Fundación Vicente Risco, foi a presentación dunha obra descoñecida ata agora do autor Antón Risco, coincidindo co centenario do seu nacemento.
A novela, titulada "Home", foi presentada polo editor Tomás G. Ahola e Antonio Blanco Rodríguez, membro do padroado da fundación. Ahola sinalou que a obra, aínda que non é puramente fantástica, contén un forte compoñente de "terror social" e "o gran medo que vivimos no século XX que foi a Guerra Civil". A súa estrutura, baseada unicamente en diálogos e sen narrador nin aclaracións, foi cualificada de "exercicio narrativo sen parangón" que esixe "a técnica dun verdadeiro mestre" para desentrañar os personaxes.
Dividida en dúas partes, "Home" aborda a cuestión de se o fascista "nace ou se fai". Na primeira parte, preséntanse as "xudiadas" que os amigos do protagonista, Lisardo, lle fan nunha noite de Entroido nos últimos anos da Segunda República. A segunda parte narra o desenlace da guerra e os anos posteriores, onde Lisardo ascende a un alto cargo da Falanxe e "vingándose terriblemente dos seus amigos, convértese nun home", segundo explicou Blanco Rodríguez.
Tomás G. Ahola destacou que a primeira parte reflicte o "terror social", comparándoo co "bullying e os abusos ao diferente" na actualidade, mentres que a segunda parte encarna "o terror absoluto do fascismo".
