O Festival Literario de Allariz (FLAZ), organizado polo Concello de Allariz e a Libraría Aira das Letras, terá lugar os días 3, 4 e 5 de xullo. O evento busca consolidarse como un referente literario, promovendo toda a cadea do libro e abordando os desafíos contemporáneos do sector.
A edición deste ano centrarase en temas de actualidade como os límites entre a verdade e a ficción, as novas perspectivas na literatura e as transformacións na difusión de obras a través das redes sociais. Participarán creadores como José Ignacio Carnero, Koldo Concejo, Tensi Gesteira, Juan Gómez-Bárcena, Lucía Solla Sobral e Antía Yáñez.
A programación arrincará o venres 3 de xullo ás 19:30 h coa conversa "O peso da verdade na ficción e viceversa", onde José Ignacio Carnero e Juan Gómez-Bárcena debaterán sobre historia, memoria e invención literaria.
O sábado 4 de xullo, ás 12:30 h, Lucía Solla Sobral e Antía Yáñez analizarán as "Novas olladas, inquedanzas e temas na literatura actual". Pola tarde, ás 17:30 h, Koldo Concejo e Tensi Gesteira abordarán "A difusión da literatura nas redes: Novas linguaxes e novos obxectivos".
A xornada do sábado pecharase cunha mesa redonda ás 19:30 h co título "Escribir para un, escribir para os demais", reunindo a todos os convidados para debater sobre a pulsión creativa e as expectativas do público.
Ademais dos debates, celebrarase a Feira de Editoras na praza do Matadoiro, un encontro do público co tecido editorial galego. Estará aberta o sábado de 16:00 a 21:00 h e o domingo de 11:00 a 21:00 h.
O domingo 5 de xullo, de 12:00 a 21:00 h, terá lugar unha lectura continuada de obras de Rafael Dieste, aberta á participación veciñal para lembrar o 45.º cabodano do autor.
