Os feitos producíronse cando o varón ameazou con facer estalar o edificio, no que se atopaban dúas bombonas de butano. Segundo fontes da Garda Civil, o 112 recibiu unha chamada de emerxencia dunha muller que alertaba de que temía pola súa vida e integridade física, indicando que a súa parella se puxera agresiva verbal e fisicamente.
Ao chegar os axentes ao portal, a muller informou da situación. No interior da vivenda, o home proferiu ameazas asegurando que procedería a facer estalar o inmoble. Ante esta circunstancia, a Garda Civil procedeu a desaloxar o edificio por motivos de seguridade.
Finalmente, o individuo arroxouse por unha xanela na parte traseira do edificio dende unha altura aproximada de nove metros. Foi trasladado ao Complexo Hospitalario Universitario de Ourense (CHUO) en estado crítico.
A Comandancia confirmou que o home conta con denuncias previas por violencia de xénero contra a mesma vítima que alertou o servizo de emerxencias.
