O presidente da Deputación de Pontevedra, Luis López, asinou co alcalde de Covelo, Pablo Castillo, o convenio para a ampliación e mellora integral do entorno do cemiterio de Barcia de Mera. Este acordo enmárcase na segunda convocatoria do Plan Provincia Extraordinaria – Plan Extra, que reparte 35 millóns de euros entre 57 concellos de menos de 50.000 habitantes da provincia.
A Deputación financiará 500.000 € do orzamento total de 601.000 €, mentres que a achega municipal, algo máis de 100.000 €, financiarase con cargo ao Plan +Provincia 2026. A institución provincial busca así colaborar cos concellos na mellora dos espazos públicos e servizos á veciñanza.
O proxecto céntrase na ampliación e mellora do cemiterio municipal. Incluirá a instalación de 90 novos nichos e 140 columbarios, a construción de dous aseos accesibles e a conexión entre a zona antiga e a nova mediante novos accesos.
Tamén se renovarán os pavimentos e accesos, combinando áreas de formigón coloreado e pavimentos brandos para o tránsito peonil, ademais de aglomerado asfáltico para o viario perimetral. Incorporaranse zonas axardinadas e espazos de canto rodado para a drenaxe.
Ademais, instalaranse novas redes subterráneas para a recollida de augas pluviais, fecais –cun sistema propio de depuración– e lixiviados. A nova iluminación LED eficiente e a plantación de novas árbores completarán o proxecto, xunto coa ocultación de contedores de lixo e a colocación de mobiliario urbano como bancos de granito, varandas, xardineiras, un cruceiro e a rotulación correspondente.
A colaboración da Deputación co Concello de Covelo nestes tres anos de mandato suma un total de 3,47 millóns de euros a través dos distintos plans de cooperación aprobados.
