A concelleira de Cultura de Ribadeo, Begoña Sanjurjo, informou da visita da reitora da USC, Rosa Crujeiras, á localidade. Tras a presentación das Xornadas Mar por Medio, nas que a USC colabora, a reitora asinou no libro de honra do Concello. Posteriormente, o alcalde e a concelleira mantiveron unha reunión de traballo con ela para explorar outras posibles colaboracións.
Estas futuras iniciativas poderían incluír o Programa A Ponte, actividades de 4º ciclo ou universidade senior, o achegamento das investigacións da USC á poboación en xeral, así como colaboracións culturais coa orquestra, o coro ou a aula de teatro da universidade.
A edil ribadense sinalou que se comezará a traballar para que algunhas destas propostas se fagan realidade en breve. Como parte da xuntanza, tamén se achegaron á rúa Ramón González para observar os avances na finalización do mural dedicado a Manuela Barreiro, a primeira muller licenciada na USC, que será inaugurado mañá.
“"Mantivemos unha xuntanza de traballo no Concello de Ribadeo co alcalde, con membros do seu equipo, e a verdade é que pensamos que foi unha xuntanza moi proveitosa tamén para Universidade de Santiago de Compostela. Na xuntanza puxemos en común varias iniciativas que a nós como Universidade nos permiten achegar a nosa actividade á sociedade e tamén contribuír a que o coñecemento saia das nosas aulas."
“"creo que podemos poñer en marcha moitas iniciativas interesantes para o pobo de Ribadeo e aí estaremos iniciando os traballos nestes meses."
