A achega da Xunta ascende a case 900.000 euros para esta actuación, que busca pór en valor o patrimonio local para o seu aproveitamento turístico. O Concello de Ribadeo estima que as obras poderían estar rematadas ao longo do vindeiro ano 2027.
Esta intervención permitirá mellorar a atención aos visitantes e peregrinos que recibe a localidade, ademais de recuperar un inmoble de interese arquitectónico e patrimonial. O proxecto de rehabilitación respectará a identidade do edificio, incluíndo a conservación do escudo da fachada.
“"O obxectivo é que a Casa Maseda poida converterse nun inmoble multifuncional que, ademais de mellorar o acceso á información turística, contribúa a reforzar a oferta cultural do municipio e a dinamización das experiencias turísticas relacionadas co seu patrimonio."
A Casa Maseda, construída en 1880, conta con dúas plantas que se distribuirán para combinar a atención directa ao público con espazos para actividades culturais. A planta baixa será para información turística e a primeira planta para exposicións e outras actividades.
A iniciativa alíñase coa Estratexia de Turismo de Galicia 2030 e é especialmente relevante nun concello polo que discorre o Camiño do Norte, que xa superou os 20.000 peregrinos neste ano.
