O propietario do Hotel Bouza, Fran Bouza, mostrou a súa satisfacción tras recibir a confirmación de Loterías e Apostas do Estado de que o seu establecemento repartiu un premio de 10.000 euros no sorteo da Primitiva celebrado o pasado sábado, día 23. Este galardón, da segunda categoría do Joker, foi o único dese tipo na provincia de Lugo, segundo informou a delegación lucense.

O Hotel Bouza, que conta cunha longa traxectoria de 40 anos como punto de venda de Loterías, sendo un dos pioneiros na localidade, recibiu a noticia o domingo pola mañá. O xerente e propietario non ocultou a súa ledicia ao coñecer que contribuían a repartir sorte entre os seus clientes.

O boleto premiado foi selado por un cliente habitual da localidade ribadense, quen se achegou ao establecemento este luns para compartir a súa alegría co dono do negocio. O Hotel Bouza, co número de receptor 49.015, xa ten rexistrados outros premios ao longo da súa historia, tal e como se reflicte nun cartel informativo no propio local.