Centos de persoas con mobilidade reducida puideron desfrutar do entorno, da area e da auga grazas ao traballo continuado das traballadoras e traballadores da Cruz Vermella, que ofreceron acompañamento humano e asistencia co equipamento adaptado, como cadeiras anfíbias ou andadores.
O alcalde, Dani Vega, subliñou o éxito da iniciativa e o agradecemento á Cruz Vermella polo seu labor. Destacou o "factor humano" que achegaron, "unirse a esa persoa que, por desgraza, ten a mobilidade reducida e tamén quere disfrutar dos nosos areais".
Vega tamén trasladou o seu agradecemento á Xunta de Galicia polo financiamento do proxecto e á Área de Benestar Social do Concello, coordinada por Elena Sierra. Sinalou que este proxecto é o único en toda Galicia que combina equipamento adaptado co acompañamento persoal.
A valoración positiva da edición deste ano na praia dos Bloques leva ao Concello a traballar xa para o vindeiro ano co obxectivo de "incrementar o Ribadeo Accesible" e analizar a incorporación doutros areais do municipio para facelos "máis accesibles para todos" de forma paulatina.
