Máis de 40 voluntarios do concello de Trabada dedícanse en corpo e alma á elaboración deste prato tradicional. Son eles os encargados de preparar o produto desde cero, utilizando materia prima local adquirida nos establecementos da propia localidade, garantindo así a autenticidade e o sabor característico da enfariñada.
“"Sen perder esa esencia, que é a parte máis importante que caracteriza esta festa."
A festa non deixa de evolucionar e cada edición introduce novidades para atraer a máis público. Este ano mantense a opción de enfariñadas sen glute, introducida con éxito o ano pasado, e repetirán os filloeiros de Muimenta, que elaborarán filloas en directo. A gran novidade desta edición é a colaboración coa Sociedade Cultural de Dicia, do concello de Burela, que ofrecerá un preparado especial con bonito de Burela para degustar xunto ás enfariñadas.
Outra das colaboracións destacadas é coa Asociación Saúde Mental A Mariña, cuxos usuarios elaboraron as cuncas para servir a enfariñada. Esta iniciativa reforza o vínculo entre o Concello de Trabada e o colectivo, visibilizando o seu traballo e contribuíndo á inclusión social. Os membros da asociación tamén estarán presentes na festa cun posto onde ofrecerán diferentes produtos.
O apartado musical tamén se reforzou para chegar a diferentes públicos. O programa comezará coa música tradicional galega do grupo Mestura de Nete, para dar paso despois a un ambiente máis de verbena co grupo Lume e a orquestra Maravilla. Este crecemento da festa provocou un cambio loxístico importante, xa que a Praza do Concello quedou pequena para acoller o evento.
“"Non cabemos, nin para traballar nin para toda a infraestrutura."
Por este motivo, a celebración trasladarase á explanada situada fronte ao parque da Rúa San Roque. O novo espazo permitirá acoller comodamente o escenario e aos centos de asistentes que se esperan para o próximo 3 de maio.
