O Concello de Xove ven de recepcionar as obras de mellora e ampliación da curva das Gulpilleiras, situada na parroquia da Rigueira. A actuación, levada a cabo pola empresa Carferlo, S.L., supón unha transformación notable deste tramo, incrementando as condicións de seguridade e circulación para os usuarios da estrada LU-P-2604, que une Xove con Monte e Valcarría.
Esta intervención foi financiada a través do Plan Único da Deputación, que achegou 206.000 euros, complementados con 165.000 euros de fondos municipais, sumando un investimento total superior aos 370.000 euros. A ampliación da estrada foi posible grazas á doazón gratuíta de terreos por parte dos propietarios colindantes, o que permitiu tamén a execución dun muro de contención para reforzar o terreo e garantir a estabilidade da plataforma viaria.
Ademais da mellora da sección da estrada, a obra incluíu a instalación dunha nova sinalización horizontal e vertical para ordenar o tráfico e aumentar a seguridade. Un dos elementos máis significativos foi a configuración dun triplo carril: dous para a continuidade da circulación principal e un terceiro para o desvío cara aos núcleos de Soutorredondo e Vila.
Aproveitando os traballos, realizáronse melloras na rede principal de abastecemento de auga, substituíndo a antiga rede procedente do Torrillón que conecta co depósito de Montevelle.
Dende o concello de Xove subliñan a importancia destas actuacións para a conservación da rede viaria, destacando como o incremento da sección e a reorganización da circulación fan os desprazamentos máis seguros e funcionais para a veciñanza.
