A conselleira de Política Social e Igualdade, Fabiola García, o delegado da Xunta en Lugo, Alfonso Villares, o alcalde de Xove, Demetrio Salgueiro, e a alcaldesa de Viveiro, Mariña Gueimunde, entre outras autoridades, participaron esta mañá no acto de entrega da nova residencia de Aspanane en Xove. O centro, financiado pola Fundación Amancio Ortega, é unha mostra do compromiso da entidade co benestar e a calidade de vida das persoas con discapacidade.
Fabiola García puxo en valor o impulso que suporá para Aspanane contar cun novo centro destas características, que lle permitirá ofrecer atención integral a medio cento de persoas da contorna. Destacou que a residencia funcionará cun sistema de unidades de convivencia para que sexa “un auténtico fogar para os usuarios”.
A conselleira agradeceu o labor que desenvolve a entidade na Mariña Lucense, cualificándoo como un piar fundamental para moitas familias. Tamén resaltou o papel da Fundación Amancio Ortega co benestar dos galegos, traducido en máis e mellores recursos, mencionando as sete residencias construídas pola organización e cedidas ao goberno galego.
