Segundo o BNG, na Praza de Lannion instalouse unha sinal vertical que indica como reservadas para o xulgado en horario de mañá unhas prazas que ata agora eran de zona azul. Esta nova sinalización non se corresponde coa pintura no chan, o que xera confusión entre os veciños que aparcan "por costume e sen reparar na sinal vertical", utilizando o sistema Ora e sendo sancionados con multas de ata 80 euros.

A portavoz do Bloque, Iria Cotelo, tamén sinalou que se están a producir sancións por aparcar nas prazas reservadas do xulgado polas tardes sen dispoñer do tícket da Ora, o que "incrementa aínda máis a confusión". Ante esta situación, o BNG pide aos veciños que "extremen a precaución" e solicitan ao goberno municipal unha sinalización "clara".

Pola súa banda, a alcaldesa Mariña Gueimunde explicou que se están a reorganizar as prazas de aparcamento en varios puntos do municipio. No caso específico da Praza de Lannion, indicou que se ampliaron os espazos reservados para o xulgado debido á súa insuficiencia previa. A colocación da sinal vertical xa se realizou, e o pintado das prazas está pendente da reincorporación do único pintor do Concello, que se atopa de baixa.

A rexedora tamén adiantou que esta reorganización continuará noutras zonas, como xa se fixo no verán coa supresión da parada de taxis de Covas. Mencionou que se prevén cambios en lugares como "diante da porta de Carlos V ou de algunha farmacia" para optimizar os espazos de estacionamento.