O dispositivo do simulacro MARSEC, que se desenvolve no porto de Burela, xerou grande expectación entre a poboación. Os buques Arnomendi, Sebastián de Ocampo, Alcotán II e Mar de Galicia ofreceron visitas previas para que os cidadáns puidesen coñecer de preto os medios dispoñibles e o traballo que realizan.
No exercicio participan máis dun cento de persoas, incluíndo 40 membros das dotacións dos patrulleiros Alborán e Arnomendi, entre 40 e 50 efectivos do Gardacostas da Xunta (con embarcacións e o helicóptero Pesca 2), e unhas 15 persoas de Vixilancia Aduaneira. Tamén colaboran a Policía Local e Protección Civil do Concello de Burela, así como o barco Gema Antonio da confraría de pescadores local, con tripulantes a bordo.
Un portavoz da Armada explicou que se elixiu Burela debido a que estaban a realizar unha campaña de vixilancia pesqueira na zona. Ao arribar ao porto, consideraron que era o escenario idóneo pola súa relevancia pesqueira e a estreita relación co sector. O exercicio, que se desenvolverá entre as dez e media da mañá e a unha e media da tarde, simulará unha vía de auga nun pesqueiro que remata en afundimento e provoca un vertido. O obxectivo é rescatar tripulantes, asistir aos evacuados, reflotar a embarcación e controlar a contaminación.
“"Creo que é unha maneira visual de ensinarlle á veciñanza os medios cos que contamos para as incidencias que poidan ocurrir."
A Armada organiza anualmente quince accións deste tipo nas costas españolas para preparar a resposta ante diferentes riscos, buscando mellorar a coordinación entre os distintos organismos e apoiar o adestramento. En terra, o posto de mando avanzado da Axencia de Emerxencias Galega (Axega), a Cruz Vermella e a Capitanía Marítima estarán presentes para coordinar as operacións.
