Esta iniciativa busca involucrar á cidadanía na elección dos topónimos, abrindo un prazo dun mes para a presentación de propostas. Os interesados poderán achegar as súas ideas tanto de forma presencial como a través de correo electrónico.
As bases detalladas do proceso publicaranse proximamente na web municipal e nas redes sociais do Concello. Poderán participar todas as persoas empadroadas en Foz, cun máximo de tres propostas por persoa. Os nomes suxeridos deberán ter relación coa localidade ou posuír un significado especial para o municipio e os seus habitantes, quedando excluídas expresamente as figuras políticas, xa representadas na corporación.
Entre as opcións valoraranse accidentes xeográficos, persoas ilustres ou temáticas específicas destacadas. Farase especial fincapé nas propostas que recoñezan a mulleres relevantes na historia do municipio que tradicionalmente non recibiron o merecido recoñecemento.
“"A proposta de exemplo, poderiamos citar como representativos de Foz unha futura Rúa do Entroido ou unha Rúa Suso Fernández."
Unha vez recollidas todas as suxestións, realizarase unha primeira selección. Posteriormente, abrirase unha consulta pública e aberta na que todos os empadroados no municipio poderán elixir, entre as propostas finalistas, os nomes que mellor representen as once vías. Finalmente, a elección será elevada á xunta de voceiros da corporación para a súa oficialización.
Os responsables municipais subliñan a importancia desta iniciativa de participación veciñal activa, xa que as achegas da cidadanía poden enriquecer notablemente a vila. Anímase tamén aos centros educativos do municipio a implicarse e formar parte deste proceso, que se concibe como un exercicio colectivo de recoñecemento a todo aquilo que representa a Foz e ás persoas relevantes da súa historia.
