O alcalde de Foz, Fran Cajoto, sinalou a importancia de chegar a acordos políticos para evitar o bloqueo municipal, agradecendo a colaboración do PP e do BNG na aprobación das contas. Destacou que, a pesar de non ser os orzamentos desexados, primou a xestión e a capacidade de negociación do goberno.
O orzamento ascende a 10.208.784 euros, unha cifra que o rexedor cualifica de axustada e realista, aínda que insuficiente para a capacidade de investimento desexada. Cajoto fixo fincapé na necesidade de equilibrar ingresos e gastos, adaptándose á recadación real do Concello.
Para mellorar a recadación, o Concello traballa na loita contra a fraude fiscal, revisando impostos pendentes e taxas de ocupación. Ademais, inclúese unha nova taxa turística, cuxo borrador se está ultimando, co obxectivo de que os visitantes contribúan ao mantemento dos servizos municipais, especialmente os reforzados no verán.
Esta taxa turística, que se prevé aplicar canto antes, podería recadar uns 40.000 euros este ano. Estes fondos non son finalistas, pero axudarán a financiar o sobreesforzo en servizos como salvamento, recollida de lixo e limpeza, que se ven reforzados polo aumento de poboación estival, cun incremento previsto duns 34 empregos temporais, 21 deles para salvamento.
Tamén se está a reorganizar a área de caravanas e a cobrar polas estancias, buscando unha xestión máis eficiente do espazo portuario en colaboración con Costas e Portos. Estableceranse criterios de control similares aos da zona azul.
As principais liñas de actuación do orzamento inclúen a axilización de contratos e pagos, a adquisición de maquinaria para evitar alugueres e a mellora de camiños rurais cunha licitación de 450.000 euros. Tamén se prevé arranxar os xardíns diante do consistorio.
O maior esforzo económico céntrase na política social, ante o que Cajoto cualifica como un "abandono da Xunta". Agradeceu á Deputación e á súa presidenta a súa implicación para incorporar a residencia de maiores de Foz á rede provincial.
O orzamento inclúe o canon da auga, cifrado en un millón de euros, e un fondo de renovación anual de 250.000 euros para obras relacionadas coa auga. O alcalde defendeu este modelo fronte ás críticas do PP.
Respecto aos proxectos do mandato, Cajoto mostrouse satisfeito co plan de mobilidade e a mellora da accesibilidade. Anunciou novidades sobre a Rúa do Pilar e outros accesos, así como a finalización das rotondas de Cangas e a licitación da mellora da intersección da Corredoira. Tamén hai proxectos importantes con Costas para paseos marítimos e zonas de esparcemento.
