Axentes da Policía Local de Burela detectaron a catro ou cinco condutores circulando coa Inspección Técnica de Vehículos (ITV) caducada e a outro sen o seguro obrigatorio para o seu automóbil. Estas infraccións foron localizadas tras a análise das imaxes captadas polas cámaras de videovixilancia instaladas na zona, concretamente no contorno da Rúa Suafonte.

Esta actuación prodúcese despois de que a semana pasada se denunciasen máis de 60 condutores en tan só tres días por circular en sentido prohibido na mesma rúa. A raíz dese incidente, os axentes reforzaron a sinalización na área, engadindo dúas novas sinais e valas para advertir aos condutores.

Os axentes manterán a vixilancia durante as festas locais, período durante o cal se cortará ao tráfico a Rúa do Berbés. A pesar do aumento de controis, as infraccións detectadas durante o pasado fin de semana foron menores, e os axentes tamén mantiveron conversas con condutores reincidentes para advertilos.