A obra, situada fronte ao edificio de Telefónica, no cruzamento das rúas Salvador de Madariaga e Eduardo Pondal, busca recuperar a tradición muralista da localidade. O evento contará coa participación do artista Xosé Blanco, unha lectura musicada de poemas de Manuel María a cargo de Tono Alonso e a interpretación do himno galego.
Este proxecto, impulsado polo Concello de Foz, enmárcase nunha iniciativa máis ampla para poñer en valor a identidade da vila, fortemente ligada ao mar e ao campo. A localidade xa conta con outros murais destacados nas proximidades da confraría e do porto, como o de Rente ao mar ou o das Pescantinas, vinculados á figura de Xosé Vizoso e ao universo de Sargadelos de Isaac Díaz Pardo.
“"A finalidade é poñer en valor a súa identidade ligada ao mar e ao campo."
O autor do mural inspirouse no poemario Versos florecidos en louvanza de Foz de Manuel María, publicado na localidade pola librería Bahía. De feito, o cartel que encabeza a obra forma parte dese poemario, e está prevista a asistencia dun representante da Fundación Manuel María ao acto de inauguración.
O artista realizou o mural mediante un proceso artesanal, integrando cada peza con coidado ata completar a composición final, que xa pode ser admirada na vila focense. A dirección municipal destacou que a obra contribúe á integración da fachada na paisaxe urbana a través dun elemento artístico.
