O Concello de Burela quixo recoñecer o labor da Asociación Cultural Fanto Fantini, organizadora do Festival Osa do Mar, tras recibir o galardón na categoría de Mellor Evento Cultural ou Musical na segunda edición dos Premios PALCO. A gala de entrega tivo lugar onte, 3 de novembro, na Sala Capitol de Santiago de Compostela.
Estes premios, impulsados pola Asociación Galega de Empresas Musicais (AGEM) en colaboración coa Xunta de Galicia, a través da Axencia Galega das Industrias Culturais (AGADIC) e os Concertos do Xacobeo, buscan destacar o mellor da industria musical galega. O recoñecemento pon en valor o esforzo e a dedicación da xente nova que fai posible cada edición do Osa do Mar, un festival que se consolidou como un referente cultural para Burela e que proxecta o nome do municipio por toda Galicia.
Dende o Concello de Burela quixeron agradecer o compromiso da asociación coa dinamización cultural da vila e animan á veciñanza a seguir apoiando iniciativas que contribúen a converter Burela nun punto de encontro para a música e a cultura.
