O conxunto de Burela chega á xornada final da categoría de Preferente con posibilidades reais de asegurar a súa permanencia. Despois de lograr un triunfo vital no campo do Ordes por 1-2, o equipo mariñán depende de si mesmo para evitar o descenso directo. Unha vitoria fronte ao Cidade de Ribeira, equipo xa descendido, no seu estadio de A Marosa, garantiríalles a salvación en máis do 90 por cento das combinacións posibles.
“"Eu o único que pido é que a afección encha A Marosa porque o apoio que nos brindaron en Betanzos ou Ordes foi espectacular e que sexamos capaces de facer a nosa parte que é gañar o partido, se con isto nos chega para seguir en Preferente pois celebrarémolo todos xuntos e se por unha carambola perdemos a categorías pois sentirse orgullosos deste grupo de xogadores que fixo un esforzo tremendo durante toda a tempada e un final de curso espectacular no que se mantiveron a flote cando ninguén daba nada por eles."
O técnico do equipo destacou o compromiso e o esforzo dos xogadores ao longo da tempada, especialmente nun tramo final onde lograron reverter unha situación complicada. Subliñou que, a pesar de estar a catro puntos da permanencia hai só tres semanas, o equipo conseguiu chegar á última xornada con todas as opcións abertas, un escenario que moitos asinarían ao inicio da campaña.
Ademais, o adestrador fixo fincapé no traballo realizado por todo o corpo técnico para infundir optimismo e cambiar a dinámica do equipo, cuxa resposta foi, segundo el, "espectacular". Tamén tivo palabras de recoñecemento para o traballo do seu predecesor, destacando a importancia de valorar o esforzo de todos os implicados para competir a este nivel na categoría.
