O Centro Tecnolóxico do Mar (CETMAR), xunto á Universidade de Oviedo e o IEO-CSIC, abriu un espazo de diálogo en Burela coas frotas artesanais do norte de Galicia. O encontro, celebrado na sede da Organización de Produtores Pesqueiros de Lugo, marca o inicio dunha colaboración continuada para analizar os efectos das medidas de conservación e planificación mariña no sector pesqueiro.
Esta primeira reunión formal do caso piloto de Galicia, enmarcada no proxecto ESPARDE (Efectos do desprazamento espacial das flotas de pesca artesanal e costeira resultantes da conservación e planificación mariña), contou coa presenza do presidente da Federación Provincial de Confrarías de Lugo, Basilio Otero, o xerente da OPP de Burela, Sergio López, e representantes da pesca de arrastre e cerco.
Jose L. Santiago, coordinador da área de Socioeconomía da Pesca do CETMAR, deu a benvida e contextualizou a pesca en Galicia. Posteriormente, Laura García de la Fuente, coordinadora de ESPARDE e investigadora da Universidade de Oviedo, presentou o proxecto e o seu alcance, mentres que Marta Ballesteros, científica do IEO-CSIC, sentou as bases da colaboración, describindo o caso concreto galego e escoitando as necesidades dos pescadores e armadores presentes.
O caso piloto galego céntrase na demarcación noratlántica, onde se estudará a coexistencia de Ecosistemas Mariños Vulnerables (EMV) e usos do plan de Ordenación do Espazo Marítimo, con especial fincapé nas zonas con potencial para a enerxía eólica mariña (NOR2, NOR3 e NOR4). O CETMAR e os seus socios buscan xerar evidencias aplicables á realidade operativa e socioeconómica do sector, incidindo na importancia da colaboración co sector para obter datos de primeira man que axuden a predicir escenarios e mellorar a xestión.
Os representantes do sector expuxeron as súas preocupacións, como o custo do carburante, as vedas temporais ou permanentes e o futuro da eólica mariña. Destacaron a variabilidade dos desprazamentos das frotas galegas e a necesidade de medir os impactos socioeconómicos para que as administracións tomen decisións informadas.
Ao remate, acordouse celebrar máis encontros para recoller datos e avanzar no proxecto ESPARDE, cualificado de ambicioso e esperanzador, co obxectivo de propor medidas de xestión adecuadas.
O proxecto ESPARDE, enmarcado no Programa Pleamar 2025, analiza como as medidas de protección e ordenación mariña inflúen nos desprazamentos da pesca artesanal e costeira no Cantábrico e na sostibilidade das comunidades pesqueiras, buscando comprender os efectos sociais, económicos e ambientais da reubicación das flotas de pequena escala.
