A declaración, publicada hoxe no Diario Oficial de Galicia, eleva a 805 os bens que gozan da máxima protección patrimonial na Comunidade Autónoma. O convento, unha edificación de principios do século XVI, atópase no lugar de Trandeiras e é propiedade do Concello de Xinzo de Limia.
O conxunto protexido inclúe o mosteiro, a igrexa (titularidade da Diocese de Ourense), o claustro, dependencias conventuais, muros perimetrais, construcións auxiliares como un forno e unha alvariza, infraestruturas hidráulicas e o bosque da contorna. Tamén se inclúen cinco retablos de madeira de notable calidade artística.
O convento é un emblema histórico da comarca e un símbolo da transición entre o gótico tardío e o renacentista. O seu valor arquitectónico destaca na monumentalidade do claustro e na portada da entrada, así como no arco triunfal da igrexa.
