O Portal de Contratos Públicos da Xunta publica a licitación, por un importe de 169.188,25 euros, da obra de mellora da accesibilidade, protección climática, eficiencia enerxética e adecuación das instalacións do centro de saúde da Fonsagrada, pertencente á área sanitaria de Lugo, A Mariña e Monforte de Lemos.
O obxectivo principal da actuación é climatizar o vestíbulo, as zonas de espera, a circulación principal e os espazos comúns do inmoble.
O contrato, que terá un prazo máximo de execución de 56 días naturais, inclúe a execución dun soportal de protección exterior e a implantación dun sistema parcial de climatización mediante tecnoloxía VRF (caudal de refrixerante variable) para as zonas comúns.
A intervención tamén abarcará a mellora da fachada, o incremento da accesibilidade, a protección fronte á choiva e a neve, e unha mellora estética xeral da instalación.
Coa execución deste contrato búscase garantir a continuidade do servizo, mellorar a eficiencia enerxética, reducir custos de mantemento e consumo eléctrico, diminuír as emisións asociadas e aumentar a dispoñibilidade da instalación.
As empresas interesadas neste procedemento teñen ata o vindeiro 19 de novembro para presentar as súas ofertas.
