A mostra, que recolle as imaxes premiadas e finalistas desta edición, foi inaugurada onte pola deputada de cultura, Natividade González. Durante o acto, salientou o compromiso da Deputación provincial "co talento emerxente e coas miradas xa consagradas que fan da imaxe a súa linguaxe e unha ferramenta de pensamento que moitas veces pasa inadvertido".
A xornada incluíu unha conferencia do gañador da última edición, Miguel Muñiz, sobre a súa obra Aventados, destacada polo xurado pola súa coherencia narrativa e atmosfera evocadora do entorno rural. Posteriormente, inaugurouse a exposición das obras premiadas de 2026: Néboa, de Carlos Folgoso Sueiro (Verín); Terra negra, de Tono Arias (A Estrada); Terra de promesas, de Roberto de la Torre Camiña (Vigo); Latencia, de Rodrigo Sánchez Suárez (Oleiros) e La mente vaciada, de Raquel López Pajares (Madrid).
No acto tamén participaron o fotógrafo e comisario da exposición Xurxo Lobato, o galardoado Miguel Muñiz, a vicepresidenta do Padroado do Museo do Pobo Galego, María Xosé Fernández Cerviño, e a deputada de Cultura da Deputación da Coruña, Natividade González.
A deputada de cultura sinalou que o premio Luís Ksado, "que honra un legado, vai co presente e mira cara ao futuro", consolidouse como un referente no apoio á creación fotográfica galega e na proxección de novas voces. Destacou tamén a calidade da exposición, que percorrerá diferentes concellos da provincia, amosando a "riqueza de voces, miradas e sensibilidades que percorre hoxe a fotografía documental".
A programación paralela do XX Premio Luís Ksado remata hoxe, 8 de outubro, ás 19:00 horas, no Auditorio do Museo do Pobo Galego, coa declaración de José Suárez como Fotógrafo Histórico, coa participación de Natividade González, Manuel Sendón e Xurxo Lobato.
