Especializada en sistemas audiovisuais, pantallas, son e tecnoloxía interactiva, Trison é recoñecida como un referente no seu sector e líder europeo na dixitalización de espazos físicos. A compañía desenvolve unha media de 6.500 proxectos anuais en máis de 100 países, contando con 23 oficinas distribuídas en 15 nacións de Europa, Asia e América.
A súa estratexia céntrase na aplicación de novas tecnoloxías para crear ecosistemas de márketing innovadores, así como novas formas de interacción visual, auditiva e olfativa cos clientes. Entre os seus clientes históricos figuran grandes nomes como Inditex, Abanca e o Real Madrid.
“"A nosa empresa ten a habilidade de liderar un sector a nivel europeo, o da integración de sistemas audiovisuais, desde Sada. E por tanto tamén temos a obriga e a responsabilidade de estar sempre á cabeza da tecnoloxía para que os nosos clientes poidan acceder ás solucións que van necesitar no futuro."
Nos últimos anos, Trison reforzou a súa posición global mediante adquisicións estratéxicas. En 2026, incorporou a alemá InfraStor GmbH, experta en infraestruturas dixitais e automatización de edificios, e a británica Pioneer Group, provedora de solucións audiovisuais e servizos eléctricos, o que lle permitiu consolidar a súa presenza no Reino Unido e expandirse en sectores como a hostalería e os servizos para estadios.
Ademais, en 2024, a tecnolóxica coruñesa adquiriu a firma Yellow Bricks, especializada na interacción de fans no deporte. Esta operación, que achegou a Trison a clubs de LaLiga de fútbol e a ACB de baloncesto, ampliou a súa capacidade para executar proxectos e prestar servizos a máis de 25 clubs e asociacións deportivas.
Un fito importante na traxectoria de Trison foi a súa participación en 2017 como provedora de servizos na construción do AVE entre Medina e A Meca, un proxecto de enxeñaría de gran envergadura. Nese mesmo ano, xunto a outro provedor histórico de Inditex, Cándido Hermida, Trison abriu as súas portas á prensa para mostrar o impacto tractor da multinacional téxtil no seu contorno, evidenciando o seu crecemento desde os seus inicios co xigante fundado por Amancio Ortega.
