A Xunta de Galicia, xunto co sindicato UGT e a Confederación de Empresarios de Galicia (CEG), alcanzou un preacordo para un plan integral que busca mellorar a prevención, o benestar laboral e facilitar a reincorporación saudable ao traballo na comunidade autónoma ata o ano 2030. O plan, que se desenvolverá ao amparo da Mesa do Diálogo Social, conta cunha dotación de 18 millóns de euros e inclúe 37 medidas enfocadas na saúde dos traballadores e na produtividade empresarial.
O conselleiro de Emprego, José González, destacou que o acordo é un "hito importante" e busca "ir todos de la mano" para abordar unha problemática "multifactorial e complexa". O plan céntrase en tres eixos principais: reforzar a prevención e o benestar laboral, mellorar a atención e os procesos de xestión das incapacidades temporais por continxencias comúns, e promover a "corresponsabilidade e o uso responsable" do sistema de protección. A prioridade é reducir as "ausencias evitables".
O acordo aborda as principais causas das baixas laborais en Galicia, que presentan unha incidencia alta, especialmente nas de maior duración con unha media superior aos 80 días. As patoloxías máis comúns son os trastornos musculoesqueléticos, a saúde mental e os procesos oncolóxicos. Factores como o envellecemento do mercado laboral, o reducido tamaño das empresas, as listas de espera sanitarias e déficits na xestión das mutuas agravan o problema, cun custo anual de 1.950 millóns de euros para Galicia.
A estratexia "propia" para Galicia contempla o reforzo do Instituto de Seguridade e Saúde Laboral de Galicia (Issga), programas de prevención avanzada en saúde mental e trastornos musculoesqueléticos, axudas ergonómicas para pemes e programas de saúde que promovan pausas activas e o benestar emocional. Tamén se ofrecerán servizos de apoio psicolóxico e musculoesquelético, formación para mandos intermedios e protocolos para facilitar a reincorporación, co obxectivo de que Galicia sexa "pioneira".
En canto á atención sanitaria, o plan prevé a creación de unidades especializadas, circuitos de recuperación funcional, o reforzo da atención primaria e a simplificación de trámites. Asinaránse convenios coas mutuas para adiantar probas diagnósticas, aínda que o conselleiro insistiu en que as altas e baixas seguen correspondendo aos profesionais do Sergas. Tamén se establecerán dispositivos conxuntos para actuar contra posibles "abusos minoritarios" e "garantías para as persoas de baixas" para evitar a súa "estigmatización".
“"É un hito importante"
“"Aquí temos que ir todos de la mano"
“"O punto de partida era incorrecto e inxusto e o logro foi cambiar o rumbo, pasando do control ao coidado"
