A Zona Comercial Obelisco na Coruña puxo en marcha a campaña "Ven ver a nosa eclipse", co obxectivo de incentivar as compras no comercio de proximidade. A iniciativa, que se desenvolve dende o 3 ata o 11 de agosto, permitirá que os clientes que realicen compras nos establecementos asociados reciban, ata fin de existencias, unhas lentes especiais homologadas para a observación segura da eclipse solar prevista para o vindeiro 12 de agosto.
Durante a presentación, a delegada da Xunta, Belén do Campo, destacou o papel dos centros comerciais abertos como dinamizadores económicos e sociais, e reafirmou o compromiso da Xunta de Galicia co comercio de proximidade. "Apoiar campañas como esta significa apostar por un modelo comercial que xera riqueza, emprego e vida nas nosas rúas", sinalou.
Do Campo lembrou que esta campaña é posible grazas ao apoio da Xunta a través de axudas destinadas aos centros comerciais abertos, que contan cun orzamento anual de 2,5 millóns de euros. Estas subvencións buscan reforzar o papel destas entidades na dinamización do comercio local.
A orde de axudas deste ano inclúe novidades como a simplificación administrativa e novos criterios de valoración que premiarán a formación para comerciantes, accións de fidelización e a captación de novos asociados. Tamén se subvencionan por primeira vez servizos de ludoteca e espazos de lecer infantil para facer as zonas comerciais máis atractivas para as familias.
Ademais, contempláronse achegas extraordinarias de ata 20.000 euros para os proxectos mellor valorados, destinadas a campañas complementarias de promoción e captación de novos públicos. A delegada concluíu que estas medidas buscan fortalecer un sector estratéxico para a economía galega, proporcionando máis ferramentas para innovar e atraer clientes.
