A Consellería de Vivenda e Planificación de Infraestruturas, representada pola conselleira María M. Allegue, e a Universidade da Coruña (UDC), a través do seu reitor Ricardo Cao, formalizaron hoxe un acordo de colaboración centrado na vivenda industrializada e nos Proxectos de Interese Autonómico (PIA) residenciais. O acto, celebrado en San Caetano, contou tamén coa presenza do secretario xeral de Vivenda e Urbanismo, Heriberto García Porto, e do director da Escola Técnica Superior da Arquitectura, Miguel Abelleira.
O obxectivo principal desta cooperación é fomentar a elaboración de propostas de ordenación urbana e vivenda colectiva que exploren estratexias innovadoras para a produción de vivenda pública en Galicia. O convenio establece que a Universidade integrará a investigación sobre vivenda pública industrializada como parte dos traballos de fin de máster (TFM) na Escola Técnica Superior de Arquitectura (ETSAC) para o curso 2026/2027.
Os traballos de fin de máster consistirán na redacción dun proxecto que incluirá a ordenación dun ámbito de solo urbanizable, as ordenanzas reguladoras, e unha análise detallada do desenvolvemento urbano e da edificación, con énfase nas novas tipoloxías de vivendas e o uso de técnicas industrializadas. A UDC tamén se compromete a publicar e difundir estes traballos académicos, ademais de organizar un ciclo de conferencias sobre a materia.
Pola súa banda, o Instituto Galego de Vivenda e Solo (IGVS) propoñerá os ámbitos de solo urbanizable para o desenvolvemento dos proxectos e colaborará coa Escola na impartición de charlas e na difusión dos resultados. O IGVS achegará á Universidade un orzamento máximo de 19.350 euros para financiar estes gastos. O convenio terá vixencia ata o 31 de decembro de 2027.
