O investigador do CITIC da UDC, Javier Pereira, e a responsable de xestión do proxecto Talentos Inclusivos, Irene Brage, compartiron os días 23 e 24 de outubro a iniciativa e a experiencia do proxecto europeo Erasmus+ EDiGIT no Congreso Mundial de Educación EDUCA 2026. O evento reuniu máis de 500 asistentes vinculados ao ámbito educativo.
Na súa intervención, titulada «Talentos Inclusivos. Un proxecto para a inclusión educativa nos centros», destacouse a importancia de impulsar propostas que favorezan a inclusión a través da ciencia, a tecnoloxía e o traballo colaborativo nos centros escolares.
Tamén se deu a coñecer o proxecto EDiGIT, baseado na metodoloxía de Talentos Inclusivos, que busca reducir a brecha dixital e favorecer a inclusión de persoas con discapacidade, especialmente con parálise cerebral, mediante unha metodoloxía estruturada e unha plataforma web para o profesorado.
O Congreso Mundial de Educación EDUCA é un encontro multidisciplinar que fomenta o intercambio de coñecementos e experiencias entre docentes e profesionais do ámbito educativo, co obxectivo de mellorar a calidade da educación.
A participación de Talentos Inclusivos e EDiGIT no congreso supón unha oportunidade para dar visibilidade ao traballo do CITIC da UDC e transferir metodoloxías educativas inclusivas a outros contextos, reforzando o compromiso con unha educación máis accesible e comprometida coa diversidade.
