O proxecto Talentos Inclusivos, impulsado polo Centro de Investigación en Tecnologías de la Información y las Comunicaciones (CITIC) da Universidade da Coruña, presentou a súa experiencia na XII edición de SIMO Educación, celebrada en IFEMA Madrid do 11 ao 13 de novembro de 2026. A iniciativa busca demostrar como a tecnoloxía pode axudar ás persoas con discapacidade a gañar autonomía e como os estudantes de Secundaria poden contribuír a facelo posible.
Na intervención do CITIC, titulada “Contidos STEM na aula para a inclusión. Un caso de éxito co proxecto Talentos Inclusivos”, Javier Pereira, responsable do proxecto, e Irene Brage, project manager, explicaron como a iniciativa leva sete cursos achegando a estudantes de Secundaria e Bacharelato a realidade das persoas con parálise cerebral mediante o desenvolvemento de solucións tecnolóxicas adaptadas ás súas necesidades.
O punto de partida son situacións e dificultades reais da vida cotiá das persoas con discapacidade. A partir delas, os estudantes traballan para comprender os problemas, buscar alternativas e deseñar dispositivos que faciliten tarefas e favorezan a autonomía persoal. As propostas son probadas e melloradas coa participación das propias persoas usuarias.
Esta metodoloxía permite aos mozos aprender programación, deseño e outras disciplinas científicas e tecnolóxicas, ao tempo que coñecen a realidade da discapacidade, desenvolven empatía e descobren como os seus coñecementos poden mellorar a sociedade. O proxecto baséase na colaboración entre centros educativos, persoas con discapacidade, entidades sociais como ASPACE Coruña, APAMP e Amencer-ASPACE, profesionais do CITIC e voluntarios de Inditex. Presentouse tamén EDIGIT, a versión internacional desenvolvida no marco do programa europeo Erasmus+.
Fina Paulos e Óscar Rey, docentes do IES Maximino Romero de Lema da Coruña, compartiron a experiencia do profesorado, destacando a implicación do alumnado ao ver a aplicación directa dos seus coñecementos para mellorar a vida de alguén. Presentaron solucións desenvolvidas polos seus estudantes, mostrando como a tecnoloxía e a creatividade poden eliminar barreiras.
A experiencia do IES Maximino Romero de Lema reflicte o potencial de Talentos Inclusivos como modelo educativo, fomentando valores como a cooperación, a responsabilidade e o compromiso cunha sociedade máis inclusiva.




