O Concello da Coruña xa puxo en marcha o plan de melloras nos campos municipais de fútbol de San Pedro de Visma. Os traballos céntranse na renovación dos tapetes de herba artificial das dúas superficies de xogo, unha iniciativa do Goberno local para adecuar unha das instalacións deportivas ao aire libre con máis uso da cidade.
A alcaldesa, Inés Rey, informou da posta en marcha destas obras, que comezan na tempada estival para aproveitar o descanso das competicións oficiais. Actuarase sobre os dous campos: o norte (100x63 m) e o sur (105x68 m). En total, renovaranse case 15.000 metros cadrados de céspede artificial.
“"Unha intervención que é necesaria para facilitar o desenvolvemento da práctica deportiva e dar resposta ás necesidades dos clubs e entidades que fan uso das instalacións, tanto para adestrar como para competir."
O novo firme cumprirá os requisitos da certificación FIFA Quality Pro, o máximo estándar internacional para campos de fútbol de céspede artificial, buscando mellorar a experiencia dos deportistas e minimizar o risco de lesións.
“"Seguimos cumprindo o noso compromiso de renovar as instalacións deportivas municipais para que os clubs da cidade dispoñan de espazos modernos e seguros. En San Pedro de Visma adestran e compiten cada semana centos de nenas e nenos, polo que garantir que o fagan sobre un terreo de xogo en perfectas condicións é unha prioridade para o noso Goberno."
O investimento desta actuación, adxudicada á empresa Mondo Ibérica, ascende a case medio millón de euros. As obras xa comezaron esta semana.
Ademais de San Pedro de Visma, o Goberno local tamén realizou melloras na Cidade Deportiva da Torre e no campo da Leyma, renovando o céspede artificial e executando outras melloras en accesibilidade e subministro de auga quente. Na Torre tamén avanzan os traballos de reforma dos vestiarios.
