A cidade da Coruña é dende hoxe e ata o vindeiro 14 de agosto o epicentro dun encontro científico de primeiro nivel. O congreso internacional Invisibles26, centrado no estudo da Física dos sectores invisibles do Universo, foi inaugurado hoxe coa presenza de destacadas figuras do ámbito científico e institucional. Este evento enmárcase no proxecto europeo Asymmetry, financiado pola Unión Europea a través do programa Horizonte Europa, que busca fomentar a colaboración internacional e interdisciplinar.
Na cerimonia de apertura estivo presente a alcaldesa, Inés Rey, xunto ao Premio Nobel de Física do ano 2015, o profesor Takaaki Kajita. Tamén participaron a profesora Pilar Hernández Gamazo, catedrática de Física Teórica da Universitat de Valencia e coordinadora da Red Invisibles; a Dra. Carmen Cotelo Queijo, directora da Axencia Galega de Innovación (GAIN); e a profesora María Belén Gavela Legazpi, catedrática de Física Teórica da Universidad Autónoma de Madrid e membro do Comité Científico do Congreso.
Durante o seu discurso, Inés Rey reivindicou o apoio das institucións públicas ao ámbito científico. "Os servidores públicos tamén temos unha tarefa crucial, un deber para con as e os profesionais da ciencia: facilitar o traballo, tender a man e crear as condicións para que as grandes mentes prosperen e a roda da investigación siga xirando", afirmou. Subliñou o compromiso da cidade co crecemento das universidades e a atracción de proxectos pioneiros, así como a aposta pola educación como clave para un futuro brillante.
O congreso reunirá na Coruña a institucións de referencia mundial en Física de Partículas, Cosmoloxía e Astrofísica, como a Universidade de Harvard, o Massachusetts Institute of Technology, a Universidade de Tokyo, a Universidade de California Berkeley - Lawrence Berkeley National Laboratory (LBNL), o CERN e o Fermi National Accelerator Laboratory. Ademais, contará coa participación de todos os beneficiarios europeos do proxecto Asymmetry.
O profesor Takaaki Kajita, doutor en Física pola Universidade de Tokio, foi galardoado co Premio Nobel en 2015 polo descubrimento da oscilación dos neutrinos. A alcaldesa tamén recibiu recentemente ao escritor Wole Soyinka, Premio Nobel de Literatura en 1986.
O próximo 12 de agosto de 2026, coincidirá coa celebración do congreso, terá lugar un eclipse total de sol, un acontecemento astronómico que situará á cidade no foco da atención científica e mediática internacional.
