O Goberno local de Oleiros deu luz verde a un expediente de expropiación para incorporar ao patrimonio público dúas parcelas que son necesarias para finalizar o parque de Canide. Esta actuación suporá un investimento de algo máis de 125.000 euros.
Estas fincas, situadas entre a avenida de María Pita e a rúa Hebrón, fronte á praza de Belén, son as únicas de titularidade privada que restan para completar a zona verde contemplada no Plan Parcial de Canide. O Plan Xeral de Ordenación Municipal xa as cualifica como solo urbano consolidado e zona verde.
O proxecto de expropiación sinala que as parcelas están pechadas cun valado metálico e unha delas conta cun muro de pedra de tres metros de altura, que previsiblemente será derrubado. O documento cualifica de "deficiente" o estado de conservación de ambas as propiedades e das árbores que albergan, como un salgueiro negro, un aguacate ou un limoeiro, indicando que se atopan "en estado de abandono e sen mantemento por parte dos seus propietarios".
O expediente, datado o 7 de xullo, permanecerá en información pública durante un mes para que os interesados poidan presentar observacións e reclamacións, especialmente en canto á titularidade e á valoración dos seus dereitos.
