O alcalde, Ángel García Seoane, manifestou a preocupación municipal pola falta de hixiene na xestión actual, que nalgunhas zonas provoca "situacións de escaso coidado ambiental" e a proliferación de roedores. Por iso, a nova empresa deberá ser "moito máis rigorosa" que a actual no mantemento dos contedores e na limpeza urbana.
O pleno do Consorcio aprobou o pasado día 6 os pregos do novo contrato de xestión de residuos. O obxectivo principal é mellorar significativamente a calidade do servizo para os cidadáns dos oito municipios integrados na entidade.
Entre as novidades incorporadas, destaca o reforzo das medidas de sustentabilidade. Isto inclúe potenciar a recollida separada para fomentar a separación na orixe e incrementar as taxas de reciclaxe. Ademais, o futuro adxudicatario terá que desenvolver actuacións específicas para a recuperación de materiais e obxectos, promovendo a reutilización e a economía circular, especialmente a través dos puntos limpos.
