A modificación busca dar resposta xurídica e técnica a unha área que, a pesar de figurar como solo urbanizable, presenta un alto grao de consolidación edificatoria e escasa viabilidade para o seu desenvolvemento nos termos previstos. A decisión afecta a 29 fincas, das cales 17 xa contan con vivendas construídas.

Un informe técnico sinala que a existencia de vivendas fai inviable a posterior reparcelación. A conversión a núcleo rural busca recoñecer a realidade da área, dotada de acceso á vía pública e servizos urbanos, segundo destacou o alcalde, Ángel García Seoane, durante o pleno.

A proposta foi apoiada por unanimidade pola oposición. O PP cualificou o cambio como un "recoñecemento obrigado" para os veciños afectados, mentres que o PSOE suxeriu aplicar medidas similares noutros lugares, lamentando a falta de "vontade política". O BNG votou a favor, pero instou a unha "reflexión crítica" sobre o modelo urbanístico municipal.

Este acordo foi o principal punto dun pleno extraordinario adiantado, convocado a petición do PP e o PSOE. Durante a sesión, o alcalde defendeu a convocatoria a pesar das indicacións do secretario municipal e eludiu responder preguntas sobre retribucións e cargos de confianza.

Os grupos da oposición criticaron a actitude do goberno local, acusándoo de "silenciarnos por decreto" e de "caciquil e ditatorial". Tamén se reprochou ao alcalde o uso de medios públicos para cualificar ao BNG de "alimañas", ante o que o rexedor respondeu que non perdoaba que "intentaran acabar comigo".