A iniciativa nace coa vocación de recuperar o espírito das festas populares de barrio, combinando a convivencia, a gastronomía e a música en directo. O evento terá lugar na praza Salvador de Madariaga a partir das 13.00 horas.
A Parrochiña xorde da vontade dun grupo de veciños e veciñas de crear un novo espazo de encontro para a comunidade. O concelleiro de Cultura e Turismo, Gonzalo Castro, xunto co organizador, Luis Suárez, destacou o valor destas iniciativas que fortalecen os lazos comunitarios e crean espazos interxeracionais.
“"Os barrios son unha parte fundamental da identidade da Coruña e proxectos como A Parrochiña contribúen a fortalecer os lazos comunitarios e a crear espazos de encontro interxeracional a través da cultura e da convivencia."
A programación inclúe un xantar popular con parrochiñas e churrasco, unha sesión vermú e actuacións musicais. A sesión vermú abriraa El Corta, seguida por Os Alcántara, Clandestinos e o DJ Hugo Mosquera.
O evento tamén prestará atención ao público infantil cun espazo específico con xogos tradicionais e artesanais de madeira e outras actividades de participación, incluído un touro mecánico.
A organización destaca a vocación de continuidade de A Parrochiña, coa intención de consolidarse como unha cita anual para fortalecer as relacións veciñais e manter vivas as tradicións populares dos barrios coruñeses.
“"O máis importante desta iniciativa é a súa capacidade para facer barrio, para xuntar persoas de diferentes idades arredor dunha mesma celebración e para reivindicar o papel dos barrios como espazos vivos de convivencia e participación."
