Este proxecto, que levaba unha década en trámites municipais, transformará un espazo de gran relevancia histórica e xeográfica pola súa singular ubicación e as súas vistas ao mar e á Torre de Hércules. A inversión prevista ascende a 1.629.946 euros, e as actuacións terán un prazo máximo de execución de 12 meses.
A transformación do espazo, situado no entorno do depósito de auga, permitirá integrar distintos elementos e eliminará muros de peche para lograr unha superficie unitaria e homoxénea. Plantarase arborado e mellorarase a accesibilidade, ademais de instalar sendeiros peonís e crear zonas de xogos e descanso.
“"O que estamos facendo con este proxecto é repensar desde cero a área e facer posible unha nova zona verde da que desfrutará non só o barrio de Monte Alto, senón toda a cidade."
Crearanse pasarelas peonís elevadas que superarán a altura dos edificios do entorno e servirán como miradoiros para gozar das vistas da Torre de Hércules. A actuación tamén inclúe a habilitación de merendeiros e hortas urbanas, así como a instalación de estanques e fontes, e a construción dunha nova infraestrutura de rega e drenaxe, dando un protagonismo especial á auga na concepción do parque.
O plan municipal busca conectar instalacións públicas, abrir vías de comunicación entre diferentes zonas do barrio de Monte Alto e establecer unha relación máis harmónica do lugar coa paisaxe circundante, coa Torre de Hércules e Punta Herminia xusto en fronte, revitalizando unha zona que actualmente carece de usos.
