O Concello prevé iniciar nos próximos días un plan integral de melloras nas calzadas municipais, centrado na rúa Juan Flórez. As actuacións incluirán a renovación do firme nunha superficie de aproximadamente 3.000 metros cadrados e a adecuación da sinalización para reforzar a seguridade viaria.
Os traballos de asfaltado, que se realizarán en horario nocturno para minimizar o impacto na circulación, comezarán na noite do domingo 12 ao luns 13 de xullo. A zona de intervención abranguerá dende o acceso da avenida de Fisterra á praza de Pontevedra, a saída do aparcadoiro subterráneo e o inicio de Juan Flórez ata o cruzamento coa rúa Médico Rodríguez.
Estas intervencións súmanse a outras xa realizadas en puntos como o paseo marítimo, a rúa Posse, a rotonda da avenida do Exército, a estrada da canceira de Bens, o treito entre Casablanca e a avenida da Pasaxe, e o Camiño do Pinar.
Ademais do asfaltado, mellorarase a sinalización horizontal e vertical nos carrís de acceso a Juan Flórez dende a avenida de Fisterra e a rúa Francisco Mariño. O obxectivo é facilitar a circulación e reducir a conxestión de tráfico nun punto clave para o transporte urbano e as manobras de incorporación á rúa Médico Rodríguez.
