Entre o venres 17 e o domingo 19, o recinto coruñés vibrará coas actuacións de Hijos de la Ruina, Viva Suecia e o fenómeno televisivo Operación Triunfo. As últimas entradas están dispoñibles para a venda en liña e no despacho de billetes da praza de Ourense, con posibilidade de compra no propio recinto se quedan pases o día do evento.
O trío madrileño Hijos de la Ruina, composto por Natos, Waor e Recycled J, será o encargado de abrir esta serie de eventos o venres. A banda regresa aos escenarios despois dunha pausa, cunha xira que os leva polas principais cidades españolas.
O sábado, a banda murciana de rock alternativo Viva Suecia tomará o relevo coa súa xira Hecho en tiempos de paz. Presentarán temas do seu último álbum, considerado un dos seus traballos máis ambiciosos, xunto cos éxitos máis destacados da súa carreira.
O peche do fin de semana, o domingo, estará a cargo de Operación Triunfo, que reunirá no escenario do Coliseum ás 16 voces protagonistas da súa edición de 2025. Entre elas, destaca a presenza do artista coruñés Tinho, nun espectáculo deseñado especificamente para grandes recintos.
“"A Coruña volve a amosar o seu músculo cultural e musical programando tres espectáculos de artistas cun grande éxito de público. Esta selección de artistas que actúan na cidade cada mes é froito do traballo constante do Goberno de Inés Rey para que A Coruña sexa parada obrigatoria nas súas xiras."
