A competición, que tivo lugar no Museo Nacional de Ciencia e Tecnoloxía (Muncyt), reuniu preto de medio centenar de escolares de entre 6 e 15 anos. Os participantes, organizados en equipos de dous ou tres integrantes, empregaron tecnoloxía de LEGO® Education para deseñar e construír robots co obxectivo de achegar solucións innovadoras baixo o desafío internacional deste ano: 'Robots Meet Culture'.

A experiencia da entidade organizadora, Arkitas Robótica, foi clave para consolidar este torneo como un referente en Galicia na tecnoloxía educativa. O evento contou co apoio de patrocinadores como Repsol, Bäup e o Cluster Tic, que impulsan as disciplinas STEM.

Paralelamente á competición principal, celebrouse a IV edición do Campionato Arkitas de Sumo Robótico, onde os robots competiron de forma autónoma nun 'dohyo' circular, demostrando a súa resistencia, deseño estrutural e estratexia.

O equipo gañador na categoría RoboBasic foi o Colexio Montespiño, composto por Amelia Veiga, Teresa Rodríguez e Vega Díaz. Outros equipos galegos e asturianos tamén obtiveron vitorias en diferentes categorías, como 'Kraken Girls' (Asturias) en Robomission-Start, 'Pokebot' da Academia Logonautas (O Morrazo) en Robomission-Rookie, e os equipos 'Team Kraken' e 'mekanik-Krakens' nas categorías Future Innovators.

Os mellores clasificados de cada categoría obterán o pase directo á Final Nacional da WRO España, que se celebrará en Andorra la Vella os días 12 e 13 de setembro, coa vista posta na Final Internacional de Porto Rico a principios de decembro.