Unha muller de avanzada idade perdeu a vida na madrugada deste luns tras declararse un incendio nunha vivenda unifamiliar situada na rúa río Quintas, na zona de Santa Gema, na Coruña. O corpo da vítima foi localizado no salón da casa.

Un veciño alertou aos servizos de emerxencia ao observar unha columna de fume saíndo dunha vivenda dunha soa planta. Cando os bombeiros chegaron ao lugar, ao redor da 01:30 horas, as chamas xa estaban practicamente extinguidas pola falta de osíxeno, aínda que o lume causara danos significativos, derretendo as persianas das fiestras e revolvendo o interior da vivenda, que se atopaba chea de enseres.

Os efectivos de emerxencia accederon ao interior da vivenda a través dunha fiestra e dirixíronse ao salón, onde atoparon o corpo da muller. Presentaba síntomas de asfixia e tamén queimaduras. O lume consumira unha mesita e varios sofás, sendo un deles onde se atopaba a vítima.

Tras comprobar que non existía risco de reactivación do lume, os bombeiros abriron a porta principal para facilitar o acceso á Policía e aos servizos sanitarios. As primeiras hipóteses apuntan a que o incendio se orixinou no mesmo salón da vivenda.