A Universidade da Coruña (UDC) investiu hoxe como doutores honoris causa á investigadora Marisol Soengas, referente internacional na loita contra o melanoma, e ao anestesiólogo e profesor do MIT Emery Brown, figura destacada da ciencia biomédica. O acto tivo lugar no Paraninfo da Reitoría, presidido polo reitor, Ricardo Cao, e coa participación de Javier Cudeiro Mazaira e María Esperanza Cerdán Villanueva como padriños.
Emery Brown, que transformou a comprensión da anestesia, a conciencia e o funcionamento do cerebro humano, impartiu a conferencia “Descifrando a Dinámica do Cerebro Inconsciente baixo Anestesia Xeral”. Explicou que a anestesia xeral non é sono e que o cerebro mantén actividade, analizando as oscilacións cerebrais visibles nun electroencefalograma (EEG) para identificar patróns específicos de actividade cerebral segundo os anestésicos e as condicións do paciente. Destacou o potencial da anestesia como ferramenta para o estudo científico do cerebro e a mellora clínica.
Pola súa banda, Marisol Soengas, que elixiu a “afouteza” como fío condutor da súa traxectoria, debullou a súa carreira centrada no estudo do melanoma. Mencionou a elección deste tema por supoñer “un gran reto”, a súa experiencia nos EEUU e o seu regreso a España para liderar o Grupo de Melanoma do Centro Nacional de Investigacións Oncolóxicas (CNIO). Subliñou a satisfacción de ver os resultados do laboratorio aplicados máis alá das publicacións científicas e a importancia de reivindicar o acceso rápido aos tratamentos para os pacientes, un esforzo colectivo que require “afouteza”.
O reitor, Ricardo Cao, sinalou que os doutoramentos honoris causa son un acto de gratitude e unha declaración de principios cara ao futuro, definindo a UDC como unha universidade aberta ao mundo, crente no poder transformador da Ciencia e coa convicción de que o coñecemento debe poñerse ao servizo da sociedade. Subliñou o elemento común das traxectorias de Brown e Soengas: as súas contribucións cambiaron a maneira de entender realidades fundamentais da condición humana.
Emery Neal Brown, profesor no MIT e na Facultade de Medicina de Harvard, combina medicina, neurociencia, enxeñaría e estatística. As súas investigacións sobre a anestesia xeral e as súas ferramentas matemáticas e estatísticas para analizar sistemas biolóxicos complexos valéronlle recoñecementos como a Medalla Nacional da Ciencia nos Estados Unidos. É o primeiro anestesiólogo e afroamericano elixido membro das Academias Nacionais de Ciencias, Medicina e Enxeñaría.
Marisol Soengas, tras doutorarse baixo a dirección de Margarita Salas e investigar nos Estados Unidos, lidera o Grupo de Melanoma do CNIO desde 2008. Os seus traballos avanzaron no coñecemento dos mecanismos moleculares do melanoma e impulsaron a medicina translacional. Recibiu numerosos premios e destaca polo seu compromiso coa transferencia do coñecemento, a defensa da investigación biomédica e a promoción da igualdade na ciencia.
