O plan especial de infraestruturas e dotacións, promovido por Centro Ecuestre Coconut Abegondo, SL, busca habilitar un equipamento privado dedicado á garda, cría, adestramento de cabalos e á aprendizaxe da equitación. O informe ambiental estratéxico, publicado no Diario Oficial de Galicia (DOG), conclúe que a posta en marcha do plan non debería xerar efectos ambientais adversos significativos, sempre que se respecten as medidas e condicións establecidas.
O ditame introduce consideracións sobre a integración paisaxística, a xestión das augas e as posibles afeccións acústicas. O ámbito do plan especial abarca máis de 16.000 metros cadrados no lugar de Ribeira, onde se construirá o complexo.
O complexo contará con cortes para os animais, un picadeiro cuberto, oficinas, cafetaría e aseos. Tamén se acondicionarán zonas de adestramento, unha área de aparcadoiro, terrazas exteriores e unha zona de pastos que manterá o seu uso actual.
A tramitación realizouse mediante avaliación ambiental estratéxica simplificada. Durante o período de consulta pública, non se presentaron observacións nin suxestións de carácter ambiental nin sobre o borrador do plan nin sobre o documento ambiental estratéxico.
