A terminal ferroviaria da Coruña volveu á normalidade este sábado, máis dun mes despois de que se interrompese o servizo debido ás obras da estación intermodal. Os edificios e os andéns rexistraron de novo a chegada e saída de convoyes e de viaxeiros.
A presenza de auxiliares de Adif guiando aos usuarios e a organización de colas para os controis de seguridade marcaron o acceso aos trens. Unha muller comentaba mentres esperaba: "Mira como está a estación. Aínda non abriron, non sei se estará o tren", referíndose ao Avant con destino a Ourense, que partiu puntual ás 10.00 horas.
Pouco antes, un tren procedente de Vigo-Urzáiz chegaba á terminal con decenas de persoas que se dirixiron á saída. Este convoy chegou con lixeiro atraso, segundo anunciou a megafonía.
Renfe retomou a circulación ferroviaria tras a finalización da segunda fase das obras de Adif na estación intermodal, que comezaron o pasado 26 de xuño. Durante este período, coincidente co inicio do verán, a compañía habilitou un plan alternativo de transporte con máis de 1.850 autobuses e 285 taxis para garantir a continuidade dos servizos afectados.
Este tempo de obras tamén xerou caos noutras terminais galegas, como Santiago, punto clave de transbordo cara a Ourense ou Madrid. Agora, Adif inicia unha nova fase de traballos na infraestrutura entre A Coruña e Uxes, o que suporá restricións na circulación neste tramo.
Debido a estas novas necesidades operativas, Renfe axustará lixeiramente o horario de dez trens de Media Distancia, Avant e Larga Distancia.
