O xurado, composto por profesionais do xornalismo, a literatura, o audiovisual e a innovación, seleccionou os gañadores dunha ducia de traballos que destacan pola súa calidade, creatividade e rigor na difusión do coñecemento. Estes premios, impulsados polo Concello da Coruña a través de Museos Científicos, buscan incentivar e promover novas ideas no ámbito da ciencia.
O concelleiro de Cultura e Turismo, Gonzalo Castro, subliñou a importancia dos premios Prisma como "toda unha institución nesta cidade", destacando o compromiso do Goberno de Inés Rey en "incentivar e premiar a excelencia e promover o nacemento de ideas novas e apaixonantes no terreo das ciencias".
Na categoría de Mellor traballo en vídeo, o galardón foi para "La luz con el tiempo dentro", de Elena Alonso Redondo, Luis Gómez Juanes e Paloma Banderas Bielicka, por facer accesible un complexo fenómeno físico. A canle de YouTube "Cuarentaydos", de José Luis Oltra Calatayud, foi recoñecida na modalidade de novos medios pola súa produción consolidada.
O proxecto "Del cloro a la diversidad", de Bárbara Martínez Escrich e Mónica López Martínez (Instituto Municipal de Gestión Medioambiental-Real Jardín Botánico de Córdoba), obtivo o premio á divulgación científica sobre a auga no medio urbano. Pola súa banda, Isabel Rubio Arroyo (El País) recibiu o premio ao mellor artigo xornalístico por "ChatGPT no pasa la prueba: así pone en peligro la vida de los menores", que expón os riscos da tecnoloxía para os máis novos.
En radio, "Calvet en bicicleta", de Manuel Vicente García, César Martínez Pérez e Rosa Pedrido Castiñeiras, foi recoñecido polo seu aproveitamento das posibilidades sonoras. O proxecto dixital "#LaCienciaDel100" de Navarrabiomed-Fundación Miguel Servet alzouse co premio ao mellor proxecto singular.
O libro "Viaje al planeta de los insectos", de Chema Catarineu (Tundra Ediciones), foi distinguido na categoría de mellor libro editado por abordar conceptos amplos a través dos insectos con humor e recursos visuais. Ademais, o evento "Desgranando Ciencia" recibiu o Prisma Especial do Xurado pola súa traxectoria e fomento da participación cidadá.
Tamén se outorgaron mencións honoríficas. En vídeo, recoñeceuse "O camiño de cova Eirós", de José González Varela. En radio, a mención foi para "Vis a vis con la ciencia", do Museo Nacional de Ciencias Naturales.
O xurado estivo presidido por Rocío Benavente (xornalista científica), actuando como secretario Marcos Pérez Maldonado (Museos Científicos Coruñeses), e como vogais Gemma del Caño (farmacéutica), Yolanda Golías (Universidade da Coruña) e Diego Ortega (Universidade de Jaén).
