Laura Castro Santos, investigadora do Centro de Investigación en Tecnoloxías Navais e Industriais (CITENI) da Universidade da Coruña (UDC), recibiu o Premio Nacional Ángeles Alvariño na área de Ciencias e Tecnoloxías dos Recursos Naturais. É unha das dez persoas galardoadas nesta categoría na edición de 2026, recoñecendo a “excelencia da súa traxectoria académica no desenvolvemento de tecnoloxías emerxentes”.
Estes premios, dotados con 30.000 € cada un, recoñecen as contribucións científicas sobresaíntes de persoal investigador con carreiras en consolidación. A distinción suma un novo fito ao traballo de Castro en enerxías renovables mariñas e transición enerxética.
“"Nunca imaxinei que algún día podería recibir un premio deste nivel. Cando era pequena, desde logo, non pensaba que chegaría ata aquí. Recibir este galardón faime unha enorme ilusión porque o sinto como o resultado de moitos anos de dedicación e do esforzo compartido con moitas persoas."
O equipo directivo do CITENI destacou que o premio “pon de manifesto a calidade da súa traxectoria e constitúe unha gran satisfacción para toda a comunidade do centro”.
Laura Castro Santos coordina o grupo de investigación Materials and Renewable Energy for Engineering, Environment and Sustainability (MARES), centrado nas enerxías renovables mariñas e a sustentabilidade. É tamén profesora na Escola Politécnica de Enxeñaría de Ferrol (EPEF).
A súa investigación céntrase na análise e optimización de sistemas enerxéticos mariños, con foco na enerxía eólica offshore, undimotriz, sistemas híbridos e solar mariña, contribuíndo á viabilidade destas tecnoloxías estratéxicas para modelos enerxéticos sostibles.
A súa traxectoria inclúe a participación en proxectos nacionais e internacionais sobre aproveitamento sostible de recursos enerxéticos mariños, como iniciativas europeas sobre enerxía eólica flotante e hidróxeno verde.
Este galardón chega despois de ser nomeada catedrática de universidade en Construcións Navais en abril, sendo a primeira muller en Galicia e a segunda en España en acadar esta categoría. Anteriormente, participou no Programa de Emparellamento Científico co Congreso dos Deputados e foi incluída na World’s Top 2% Scientist List en 2024 e 2025.
A edición 2026 dos premios nacionais de investigación tamén recoñeceu a outras tres persoas ligadas a Galicia: Ángel Carracedo Álvarez (Universidade de Santiago de Compostela), Carmen Álvarez Lorenzo (Universidade de Santiago de Compostela) e José Antonio Sobrino (Universidade de Valencia).
