A programación estival arranca o día 5 de agosto co xogo tradicional Busca a Bandeira e unha saída ao Aquapark de Cerceda o día 6. Durante o mes, desenvolveranse tamén obradoiros de cociña e resina, xornadas de kaiak na praia de Santa Cruz, e sesións de cine ao aire libre, previstas para os días 9 e 23.
O calendario de actividades complétase cun torneo de tenis de mesa o día 14, unha xincana o 19 e unha xornada de xogos de auga o 20. Ademais, entre o 26 e o 28 de agosto impartirase unha nova edición de “Mociradio”. O peche da programación terá lugar o día 29 coa Festa Fin de Verán, que despedirá as vacacións nas Casas da Mocidade.
Debido á limitación de prazas, é imprescindible realizar a inscrición previa a través das canles habituais das Casas da Mocidade, localizables en @centrosmocidadeoleiros. Todas estas actividades, así como os servizos das instalacións xuvenís, están pensadas para o encontro, o lecer e a participación activa.
As instalacións contan con diversos recursos como cociña, consolas, zona chill-out exterior, futbolín, billar, ping-pong e dardos. O Goberno local anima á mocidade a participar nesta oferta de ocio saudable, activo e gratuíto durante o mes de agosto.
