O primeiro tenente de alcaldesa da Coruña, José Manuel Lage Tuñas, apostou hoxe por construír a área metropolitana da cidade desde o diálogo e a cooperación entre concellos, co obxectivo de mellorar os servizos públicos e impulsar o progreso económico e social. Estas declaracións realizáronse durante a súa participación nunhas xornadas organizadas pola Área Metropolitana de Barcelona (AMB).
Lage sinalou a Barcelona como un bo exemplo de cooperación institucional e defendeu a necesidade de construír un modelo metropolitano propio para A Coruña, baseado na colaboración voluntaria entre municipios. "Entendemos o proxecto metropolitano como unha decisión colectiva, onde teñen que estar de acordo a maioría dos concellos, débese facer sen imposicións, con diálogo, e pensando na maioría dos cidadáns, en mellorar a súa calidade de vida e os servizos que reciben", afirmou.
O concelleiro tamén defendeu que o futuro metropolitano da Coruña non depende da creación dunha nova administración, senén de establecer unha nova forma de cooperar, priorizando os servizos públicos e as necesidades da cidadanía. Propuxo á Xunta abrir un diálogo para constituír unha autoridade metropolitana do transporte mediante un consorcio, xa que considera que a Xunta foi "incapaz de resolver o problema da mobilidade metropolitana" a pesar de ter as competencias.
Así mesmo, Lage subliñou que a mobilidade é unha das principais prioridades metropolitanas e que os cidadáns padecen as consecuencias da falta de coordinación do transporte público. "Os cidadáns non entenden de fronteiras administrativas. Viven nun municipio, traballan noutro e desprázanse diariamente por toda a área metropolitana. Necesitamos respostas conxuntas para unha realidade que xa é metropolitana", explicou.
Ademais da mobilidade, Lage defendeu a necesidade de avanzar nunha planificación territorial metropolitana que aborde conxuntamente as políticas de vivenda, os novos desenvolvementos residenciais, as infraestruturas e os grandes equipamentos. Lembrou a experiencia de cooperación supramunicipal da Coruña a través de EMALCSA (auga), EDAR Bens (servizos a varios concellos) e a planta de Nostián (residuos), destacando que "estas experiencias demostran que é posible prestar servizos públicos de maneira eficiente".
Finalmente, Lage Tuñas reiterou a vontade do Goberno municipal de impulsar este proceso desde o diálogo, o consenso e o liderado compartido, "sempre tendo claro que é necesario mellorar os servizos aos cidadáns". Concluiu que o compromiso é "construír acordos e ofrecer solucións concretas", mellorando a calidade de vida mediante a cooperación entre concellos.
