O director xeral de Comercio e Consumo, Gabriel Alén, participou hoxe na praza de España da Coruña na entrega de premios da campaña 'Merca no teu comercio'. Esta iniciativa, enmarcada na colaboración entre a Xunta e a Federación Galega de Comercio, busca dinamizar o consumo local e xa percorreu máis de medio cento de asociacións de comerciantes en distintas localidades sen centros comerciais abertos.
Na provincia da Coruña, a campaña está activa nos municipios de Oleiros e Sada. Ata o 15 de outubro, a clientela participante poderá gañar 20 tarxetas regalo de 50 euros.
Noutras zonas de Galicia, a campaña desenvólvese esta quincena nos barrios da cidade de Lugo, no concello ourensán de Barbadás e nas localidades pontevedresas de Arbo, As Neves e Salvaterra de Miño.
Para participar, é necesario rexistrar a compra na web www.mercanoteucomercio.com. Os comerciantes tamén poden deixar constancia da compra, duplicando así as posibilidades de gañar da clientela.
