A delegada da Xunta lembrou a boa acollida desta iniciativa, que na súa última convocatoria do pasado mes de maio esgotouse en tan só cinco días, confirmando o interese que esperta entre a cidadanía e o comercio local. A nova convocatoria, publicada o martes no Diario Oficial de Galicia (DOG), mantén a mesma contía que a edición anterior, sumando a Xunta un total de 5 millóns de euros investidos este ano nesta campaña.
Os bonos, que poden descargarse desde o pasado mércores 28 de outubro a través da web www.bonosactivacomercio.gal, ofrecen descontos progresivos segundo o importe da compra: 5 euros para gastos entre 20 e 30 euros, 10 euros para compras entre 30 e 50 euros, e 15 euros para compras iguais ou superiores a 50 euros. Cada persoa pode obter un bono cun valor máximo de 30 euros, aplicable mediante un código QR dixital.
Belén do Campo destacou o papel fundamental do comercio de proximidade na economía local e a importancia de medidas que estimulen as vendas e faciliten o aforro aos consumidores. Estímase que esta nova convocatoria mobilizará máis de 8,5 millóns de euros en vendas.
Os establecementos que xa participaron na primeira edición deste ano conservan a súa adhesión. Os comercios que queiran sumarse teñen de prazo ata o 15 de decembro ou ata esgotar o crédito. Ademais, manterase o sorteo nas contas de Instagram e TikTok da Xunta de Galicia de catro bonos de 250 euros, que deberán reinvestirse nos comercios adheridos nun prazo dunha semana.
