O Concello da Coruña rendeu homenaxe este luns á Policía Local no transcurso dun acto celebrado no Palacio Municipal. A rexedora, Inés Rey, presidiu a cerimonia na que se outorgaron recoñecementos a axentes con 20, 35 e 40 anos de servizo, así como aos xubilados en 2025, aos distinguidos pola súa traxectoria e actos de mérito, e a personalidades civís colaboradoras.

Durante o seu discurso, a alcaldesa destacou a "disciplina, a profesionalidade e a humanidade" dos membros do corpo, subliñando o seu papel esencial na cidade. "Sodes os que estades aí cando se vos precisa. Os que pensades primeiro nos demais. Os que inculcades o civismo dende o púlpito máis alto de todos: o do bo exemplo", afirmou Rey.

O evento contou coa presenza de destacadas autoridades, incluíndo o presidente do Tribunal Superior de Xustiza de Galicia, Ignacio Picatoste Sueira; o xeneral xefe do Mando de Apoio á Manobra (MAM), Marcial González Prada; o subdelegado do Goberno, Julio Abalde Alonso; e o director xeral de Emerxencias e Interior e da AGASP, Santiago Villanueva Álvarez.

Rey tamén aproveitou a ocasión para resaltar a dedicación diaria dos axentes na procura da seguridade e o benestar na cidade. "É verdade que queda moito por facer. Pero existen motivos para o optimismo. A criminalidade xeral na Coruña descendeu no último ano un 1%, e a criminalidade convencional, ata un 5,7%. Son datos que nos sitúan por riba da media nacional en termos de seguridade e que reflicten o froito das accións valentes de todos os axentes", concluíu.